ERROR今年成军6周年，终于推出跳唱新歌〈野舞士〉，而新曲MV亦刚上架，玩怀旧风，最惊喜就是邀来陈慧娴客串演出，直线致敬经典歌曲〈跳舞街〉。
ERROR新歌〈野舞士〉走80年代citypop曲风 ，Fatboy形容：「今次曲风偏向80年代〈跳舞街〉嘅曲风，有种怀旧感觉，同埋我哋会一齐跳舞！」Poki说：「因为个feel比较Japanese，所以一听呢首歌会感觉kimochi(舒服)。」今次推出跳唱作品，Dee表示是Fatboy多年心愿：「咁多年嚟大家都期待我哋有跳舞作品，亦当係肥仔嘅心愿，佢一直都係以个人跳唱歌手努力，今次ERROR终于配合佢推出一首跳舞歌，仲要係好un得嘅一首歌！」虽说是跳唱作品，但193表示：「呢首歌配合我哋成军6周年，但赶住出MV，所以舞唔係排咗好多。」
Poki说到跳唱：「最紧要跳得开心，技术嚟讲一定有，但开心係重要因素。」193表示认同：「我哋唔係讲跳得齐唔齐，係讲个vibe，同埋每个人都有啲个人风格融入喺团体舞入面，呢个係好有特色！」跳舞最强的Fatboy：「ERROR跳舞卖freestyle，唔係卖齐整。」Fatboy亦透露今次他找来好友兼排舞师Ali编舞：「之前我哋演唱会都係佢排，所以搵返佢嚟排，基本上啲舞步唔算好难，我哋仲度一个freestyle位俾Poki跳佢嘅台客舞。」193补充：「我见仲有加入Fatboy嘅搓肚腩，呢个我哋做唔到喇，唔知嗰几下搓肚腩係咪为肥仔而排？」
〈野舞士〉曲风带有80年代广东歌经典〈跳舞街〉的感觉，Fatboy于是忽发想，邀请了〈跳舞街〉的主唱陈慧娴客串MV，Fatboy表示：「慧娴姐姐唔使跳舞，呢个MV有少少剧情搵佢客串，因为某程度上呢首歌都係向〈跳舞街〉致敬，所以搵佢过嚟係为我哋嘅MV增添气息。」Dee感谢陈慧娴今次参与：「多谢慧娴姐姐抽空过嚟，加持一下我哋呢首新歌，都希望演唱会有冇机会合作到。」问到众人对陈慧娴的认识，Fatboy即表示：「我嘅回忆就係〈千千阙歌〉！」193亦笑言：「我哋『大大个』已经有听慧娴姐姐，听到而家真係大大个都继续听，一直觉得佢好靓，但未见过真人，嗰种期待度，就好似期待一个电视人物喺电视机走出嚟。」193更坦言在见面前，他是有点紧张呢！至于Dee则大讚陈慧娴歌声甜美，Poki更扬言：「佢嘅经典歌一定要keep住听！」
谈到6周年，ERROR转回感性mode，193分享道：「多谢fans一直陪伴我哋，我哋係自暴自弃嘅艺人，最近投票嘅我最喜爱组合都冇乜宣传过但都keep住投我哋，好感谢大家，喺我哋冇出声嘅时候都继续撑我哋。」Poki也道：「多谢大家，呢6年都辛苦喇！」193听到Poki所言，续道：「辛苦晒去支持我哋呢啲劣质艺人，不过只係我同Poki。」虽然听似玩笑性质，但相信亦是ERROR打从心底最诚恳的谢辞。