「宇宙最强」甄子丹在电影《误判》身兼三职，对选角极之严谨，更找来视后蔡思贝及黄智雯客串助阵。子丹大爆思贝一场重遇戏需重拍3次，但并非因其演技有问题，而是拍了两个版本，望从中挑选最好。为求完美，他拍摄时不断地变，吴镇宇有一场文戏亦变成「只揪」戏，子丹笑言事前花了很多唇舌才说服对方，出来效果亦火花十足！
由甄子丹、张智霖及许冠文主演的电影《误判》将于圣诞档上映，子丹身兼监製、导演、主演三职，对选角方面极为审慎，更亲自监督试镜：「呢套戏每个演员都係我要求入组，我好好运，个个都演得非常好。我第一个见嘅係刘江叔，佢有一个视频讲自己嘅过去，讲嘅时候充满住一种傲骨，好啱做戏入面冯皓扬公公呢个角色，至于思贝呢，佢比较少演执法人员，个角色都好啱佢，除咗有打戏之外，佢仲有一场喺港铁同我再遇见嘅戏份，呢个有两个版本，重拍咗3次，因为我想睇吓边个拍出嚟效果好啲，佢每次都好配合，文戏、动作戏都好好。」
天台群殴打通宵
黄智雯片中客串律师，原来外形为她加了不少分，子丹透露：「我想搵一个女演员演律师，呢个律师外表唔会畀人感觉好犀利，要柔弱啲，但内裏係好厉害嘅，智雯好适合。」
影片有甄子丹，打戏当然不能少，今次《误》片有多个别出心裁的打斗场面，其中于酒吧天台群殴戏，子丹更用上航拍一镜过，他同时间与几十位武师一齐打，难度超高：「呢场戏完全冇用CG，一个镜头落，讲真都好难拍得番，4、50人打咗成个通宵。（咁高压嘅拍摄仲要打足成晚，咪好难捱？）係！要靠意志，仲要稍一不留神随时会出事，好简单有场羊羊（冯皓扬暱称）逃避追捕嘅戏，佢只係爬上去铁丝网再被扯落嚟，都畀啲铁线刮到成只手爆缸，呢啲控制唔到。」
吴镇宇片中与子丹经常对立，有一场两人嗌交戏，子丹为了更有味道，决定加插一场「只揪」戏，他对镇宇拍打戏亦信心十足：「佢拍咗咁多年戏，一定冇问题，我同一班编剧度桥嘅时候，觉得加插只揪戏成件事会昇华好多，但始终镇宇係一个咁有经验嘅演员，都会过滤应唔应该做，我身为导演当然要Sell桥，同佢用唔同嘅观点以及角度去分析，最后佢都欣然接受咗，出嚟效果亦非常之好。」
除了酒吧天台大型动作戏，子丹还有一场在港铁车厢内与杀手的对打戏，因打到整个车厢破烂，不可能借实景拍摄，故特别再花7位数字去搭景，他说：「个景係一比一咁去做，好多嘢甚至櫈同扶手嘅钢质都係真实，地下仲要加机器嚟製造出列车行走时嘅移动，真係用咗好多钱，不惜工本。」
更多新闻，请浏览东方日报网页：
https://orientaldaily.on.cc/
东网网站 : https://on.cc/东网Facebook专页 : https://www.facebook.com/onccnews/