林盛斌（Bob）近年积极在不同场地开栋笃笑，昨日（11月28日）他趁感恩节宣布明年3月将在红馆开首个栋笃笑，亦是继许冠文、黄子华和林海峰后，第4个在红馆开栋笃笑的艺人。Bob特别感谢拍档小霖不停为他入纸，经过无数次失败后，终于收到好消息。
林盛斌在社交平台写道：「我一直都相信感恩嘅力量。大学毕业之后，加入新城电台做营业员，做咗九个月，之后去咗节目部做PA，再经过咗一段时间，终于有自己嘅节目，开咪做DJ，做咗好几年，之后好好彩可以加入电视台，做咗好多个综艺节目，拍咗好几个剧集，然后中间亦都有去拍过唔少我好喜爱嘅电影，每一个阶段，每一个机会，我都心怀感恩。每一日，我都同自己讲，要继续努力，继续进步，因为自己唔係一个好叻嘅人，所以一定要鞭策自己，令到自己可以再叻啲，再好啲，再劲啲。」
「2015年12月，喺伊利沙伯体育馆，我开咗我人生第一个栋笃笑Bob’s Up，跟住去咗好几个唔同嘅地方做咗一个小巡迴。2021年12月，喺九龙湾Star Hall，开咗第二次嘅栋笃笑The Bobfather，好开心，亦非常感恩得到好多人嘅支持、令 The Bobfather呢个 Talk show 可以去咗好多好多个地方做咗个大巡迴，我地一直都希望呢个系列嘅尾站可以返嚟香港，搵个场地，再做多一次，为我人生第二个Talk show 写上一个完美嘅落幕。」
「咁多年嚟，我嘅人生教练兼好拍档小霖，不断入纸申请去一个我哋好想去嘅地方，无奈地，每一次都係拒绝、拒绝、再拒绝，佢曾经同我讲过，已经被拒绝到冇晒感觉，但係佢仍然坚持继续去试，唔放弃地去试，而我就每日都不断用吸引力法则去构想，谂吓自己喺台下等紧升降台升我上去嘅心情，谂吓自己身处现场被观众包围嘅感觉，谂吓每讲一个gag观众笑得好开心嘅画面。」
「喺呢个场地，曾经开过栋笃笑嘅演艺界人士，就係只有黄子华，林海峰，许冠文，每一位都係我非常欣赏同埋尊重嘅前辈。我，阿Bob，林盛斌，将会係第四个。今日係感恩节，各位亲爱嘅好朋友，喺度我正式宣布：『The Bobfather，终极尾站Finale，三月，红馆见！』感恩这麽多年每一个，一直支持我，一直相信我嘅朋友！今次，我觉得自己，真係好争气！最后，老土啲同现实啲都要讲嘅，如果各位想同我一齐见证和赞助支持这次 The Bobfather Finale 红馆尾站嘅朋友，非常十分之欢迎大家联络小霖或者我经理人Kaman。Happy Thanksgiving Day !! 相信便看见，有志事竟成，祝大家感恩节快乐！2025年，三月，我地红馆见。」